2023 сыл алтынньы 16 күнүгэр Дьокуускай куоракка Ф.И. Авдеева аатынан Оҕо айымньытын дыбарыаһыгар өрөспүүбүлүкэтээҕи XVIII “Көтүөххэ үрдүккэ хотойдуу” уолан ааҕыыларыгар С.К. Макаров аатынан Чурапчы гимназиятыттан икки бөлөх ситиһиилээхтик кыттан, “Умсулҕан” ( 8 кылаас) уонна “Өркөн” ( 10 кылаас) 2-с истиэпэннээх дипломант аатын дьоһуннаахтык ыллылар.
Финалга сэттэ уол ” Бастыҥ ааҕааччы” аатын ылар иһин куонкуруһугар Михайлов Андрей (8 кылаас) уонна Степанов Андрей ( 10 кылаас) таҕыстылар. Түмүккэ “Өрөгөй” диэн анал ааты Степанов Андрей (10 кылаас) ылан, муҥутуур кыайыылааҕынан буолла уонна тохсунньу ыйга Ил Дархан оскуола оҕолоругар аналлаах Саҥа дьыллааҕы тэрээһинигэр кыттар чиэскэ тигистэ.
Макаров Олег ( 10 кылаас) үөрэххэ, өрөспүүбүлүкэ, арассыыйа, таһымнаах араас куонкурустарга: успуорка, научнай кэмпириэнсийэлэргэ, уолан ааҕыыларыгар, оҕо хамсааһынын тэрээһинигэр – бастыҥ көрдөрүүтүн , көхтөөх кыттыытын иһин СӨ ыччат министиэристибэтин “Дьулуур” диэн түөскэ анньыллар бэлиэтинэн наҕараадаланна. Оҕолорбутун бу үрдүк ситиһиилэринэн эҕэрдэлиибит. Инникитин да ситиһиилэр кэлэ турдуннар.
Уолаттар 10 күн устата ” Бэс чагда” оҕо сынньалаҥ киинигэр сылдьан, эт-хаан өртүнэн чэбдигирдилэр, доруобуйаларын тупсардылар, элбэх тэрээһиннэргэ: култуура, ускуустуба диэйэтэллэрин, талааннаах ыччаты, суруйааччылары, артыыстары, ТВ, хаһыат, араадьыйа үлэһиттэрин көрсөн кэпсэтэн, элбэҕи биллилэр- көрдүлэр, сайыннылар.
Гимназия салалтатыгар, учууталларга, төрөппүттэргэ, бу уолан ааҕыыларын тэрийбит салайааччы Д.П. Коркин аатынан Чурапчы өрөспүүбүлүкэтээҕи спортивнай олимпийскай эрэллэри бэлэмниир орто оскуола-интэринээт саха тылын учуутала Акулина Николаевна Кузьминаҕа, бэйэбит салайааччыбыт Фекла Николаевна Болдовскаяҕа, Яна Николаевна Иванова дириэктэрдээх “Бэс чагда” оҕо сынньалаҥ киинин үлэһиттэригэр барҕа махталбытын тиэрдэбит.
